حكاية وهيبة مع تيشرتات عواد.. وما يطلبه اللاعبون!
محمد سيف الدين
12
125
** مش فاضل غير 15 تيشيرت يا وهيبة! أوووووه.. ماهم كتير أهو يا عواد. يا أخويا غير وانبسط مش فاضل غير 10 يا وهيبة! يا سيدى.. هو إحنا بنشتريهم ما هم موجودين عندنا وبتوعنا! مش فاضل غير 5 يا وهيبة! ولا يهمك.. المهم مزاجك وأناقتك مابقاش فاضل حاجة يا وهيبة! طب وبعيدين.. هتعمل إيه يا عواد حاستلف من "أهلى" يا وهيبة!!

ما يطلبه اللاعبون: من طارق وعبدالخالق وسبالك ومالك طالبين يروحوا الزمالك نظمى وعزمى ورسمى وفهمى عايزين ولو إعارة للأهلى زايد وزياد وعابد وعبادة عايزين من ناديهم زيادة على الجزار وعليوة النجار اتخانقوا مع بعض بالمنشار ومقدمين صلح واعتذار فاتح وفتوح وفتحى وفتيحة شارطين فوق العقد موتوسيكل ومرجيحة حماقى ورجائى ووفائى مصممين على الشرط الجزائى عرفة وعرفات وفريحة وفرحات طالبين ترضيات فادى ونادى وشادى وهادى منقطعين عن التدريب ومرواح النادى فارس وفراس وأبورواش وقلاش عايزين فلوسهم كاش عنتر وزعتر وشبندر وغندر متمردين وحالفين ليحترفوا فى أندية البندر سينجار وشيكمار وجوبلار وأوسكار رافضين القبض بالجنيه وعايزين الدولار

................................

** انتخابات اتحاد الكرة: ده عمل تطوعى سيادتك.. يعنى أنا نازل أخدم لا أنا عايز منفعة مادية ولا مكاسب أدبية.. مستورة والحمد لله.. إذا كان على المال تجارتى مكفيانى وبالمال مغرقانى، وإذا كان على الشهرة الناس كلها عرفانى! شوف يا باشا.. أنا نازل الانتخابات وهدفى المصلحة العامة.. آه خدمة لوجه الله لا أريد جزاء ولا شكورا.. أمال إيه

.. عايزين نرفع مستوى الكورة ونهتم بالناشئين وأندية الغلابة المهمشين ونحفظ حقوق اللاعبين ونتصدى للمشاغبين، ونجيب موارد للأندية، ونعمل مسابقات منتظمة، ونضع لوائح واضحة وحاسمة. بص سعادتك.. هى مش فهلوة ولا منظرة.. دى خبرات وجهد واتصالات.. طبعا.. الواحد لازم يعطى كل وقته ومجهوده وخبراته من أجل نجاح المنظومة.. ده هدفى.. النجاح وتحقيق الإنجازات وتجاوز العقبات.. وفى الأول والآخر هى منافسة شريفة.. طبعا إحنا كلنا زملاء وأصدقاء،

لعبنا مع بعض أو سافرنا مع بعض وكلنا عيش وملح مع بعض، يعنى إللى ينجح نقوله مبروك وعلى بركة الله ونقف وراه ونسانده، وإللى يسقط نقوله هارد لك ومفيش نصيب ونفسك معانا ونتعاون والمصلحة واحدة وعامة. دى عينة من كلام وتصريحات أى مرشح نازل انتخابات اتحاد الكرة.

كلام حلو ورزين ويخلى الدمعة تفر من عينك.. بس على رأى المثل "من برة هالله هالله ومن جوة يعلم الله"! وراء الكواليس وفى الغرف المغلقة تسمع كلامًا من عينة:

ــ أنت ربطت مع فلان؟.. أيوة يا جدع حط فى بطنك بطيخة صيفى، المعلوم وصل وكل شىء تمام.. طب وعلان؟.. سيبك منه ده جعجاع على الفاضى.. بس ممكن يتكلم كتير ويعملّنا قلق؟.. نعم.. وحياة والدته.. هو ناسى نفسه.

ــ والأفندى إللى نازل ده حكايته إيه؟.. ماتخافش، كبيره صوت ولا صوتين!

ــ سمعت تصريحات سى علان؟.. كبر دماغك، لو نجح هنعرف نلمه! ــ شفت صاحبك إللى قعد معانا واتعشينا وقرينا الفاتحة علشان يساندنا ويدعمنا، بيعمل دعاية وتربيطات من تحت تحت لفلان؟.. ذنبه على جنبه، يبقى يقابلنى لو مصلحته مشيت، وخلى فلان ينفعه! يا كابتن. أنت هتسيب علان ينجح؟.. ينجح مين يا عم الحاج وحياة والدته عمره ما هيشمها، هو أنا هسيبه!

.............................

** رحل زميلى وصديقى وأخى سعيد عيسى يااااه يا عم سعيد.. كده برضه.. تسيبنا فجأة! يا زميل الدراسة ورفيق الدرب فى بلاط صاحبة الجلالة يا أبو قلب طيب.. وضحكة رايقة.. يا عشرة سنين طب.. ساندوتشات الكبدة والسجق والفول والطعمية والجبنة الرومى والحلاوة بالقشطة واللب السورى والسوبر، والشاى والقهوة لزوم السهرة علشان ماتشات أوروبا؟

.. أعمل فيها إيه؟. عشت بيننا هادئا ووديعا.. وهكذا رحلت وانسحبت.. فى هدوء. لا نزكيك على الله.. هو أعلم بك وبنا.. لكن.. أتخيل.. بل أدعو.. أن يكون قبرك روضة من رياض الجنة.. أن تحتفل بك السماء.. تستقبلك طيور وزهور وعطور. (يا رفيق الدرب.. ذهبت الأيام ونامت الآلام.. واحتواك التراب.. سلام عليك يا خير الأصحاب)

رابط دائم: 
 
 
 
 
 
البريد الالكترونى
الاسم
 
عنوان التعليق
 
التعليق